La discriminación ambiental

La calidá de vida de la población ta condicionada pola calidá del ambiente natural y social en que s’atopa. Les sociedaes vienen desarrollando actividaes que son ambientalmente discriminatories. Una de les causes ye la falta de conciencia de que la degradación ambiental afecta non sólo a los recursos naturales sinón tamién a la vida humana; esta relación ye más evidente cuando la degradación ambiental causa problemes graves de salú y de calidá de vida.

El primer pasu p'afrontar la discriminación ambiental ye tomar conciencia de la so esistencia. Ye necesario considerar la manera en que desarrollamos el comercio, les obres públiques, les lleis, y el control y evaluación de les actividaes qu’afecten de forma desigual al mediu ambiente de dellos sectores de la población. La sociedá tien de participar activamente na toma de decisiones nestes árees.

La discriminación ambiental acentúase nos sectores más probes, vulnerables y marxinaos de la población. Por esta razón, les sociedaes tienen que desendolcar una sensibilidá especial énte les condiciones ambientales d’estos grupos.

La probitú va de la mano de la discriminación ambiental, pero tamién con otres formes de racismu y discriminación. Los barrios probes de les nuestres grandes ciudaes sufren davezu la presencia d’una carga excesiva d’industries contaminantes, vertederos irregulares, ausencia de depuración del agua residual, etc., que s’axunten a la falta de posibilidaes culturales, sanitaries y d’incorporación al mundu llaboral.

Esta situación repercute mui directamente nos rapacinos y mozos que viven nestes árees, porque llimiten el so desarrollu como seres saludables. Les intoxicaciones, enfermedaes infeccioses y de tresmisión sexual, drogadicción, trestornos psiquiátricos y del comportamientu, accidentes llaborales y en casa, increméntense ente ellos.

Otros sectores especialmente vulnerables son les muyeres, los neños, los discapacitaos y los refuxaos ambientales (persones forzaes a abandonar los sos llares pola degradación ambiental). Delles comunidaes minoritaries, como los indíxenes y los xitanos, sufren una discriminación ambiental seria, porque, davezu, dependen de los recursos naturales pa la so subsistencia cultural. Del mesmu mou qu’otros sectores vulnerables, estes comunidaes nun tienen los medios o l’accesu a la toma de decisiones empobinaes a evitar que se produza un dañu nel so mediu ambiente.

Una manera d’identificar la discriminación ambiental ye per medio de la realización d’estudios d’impactu ambiental, que permiten prever posibles efectos nel ambiente de dalguna actividá propuesta. Nun ye abondo analizar l’impactu ambiental d’un proyectu determináu, sinón que tamién se tien de considerar l’impactu humanu. Y tienen que recoyer non solo l’impactu internu o inmediatu de l’actividá sinón tamién la manera en qu’afecta a la sociedá na so totalidá, asina como’l ciclu de vida de los productos qu’afecten a les poblaciones humanes al traviés de les etapes d’usu y desechu. Estos estudios puen ayudar a reformular proyectos pa que sían menos discriminatorios y perxudiciales pal mediu ambiente.

Amás, los gobiernos nacionales y locales tienen de promover y promulgar lleis pa la protección del mediu ambiente p’asegurar l’exerciciu de los derechos humanos de los individuos más vulnerables.

L’artículu 45 de la Constitución española establez el derechu de los ciudadanos al mediu ambiente: “Toos tienen el derechu a disfrutar d’un mediu ambiente afayadizu pal esponxigue de la persona, asina como’l deber de conservalu; los poderes públicos curiarán l’emplegu correctu de tolos recursos naturales, col envís de protexer y ameyorar la calidá de la vida y defender y iguar el mediu ambiente, encontándose na pernecesaria solidaridá colectiva...".

Cuando nun se cumpla la llei, los ciudadanos puen presionar al gobiernu pa qu’asegure’l so cumplimientu o ellos mesmos puen instaurar acciones privaes.