Vitamines antioxidantes

La vitamina E alcuéntrase fundamentalmente nos frutos secos, nos vexetales de fueya verde, nel maíz y nos aceites vexetales; los cítricos, los tomates y en xeneral la fruta, verdura y hortalexa son fontes bones de vitamina C.

Probablemente una de las causes meyor identificaes del retrasu nel crecimientu fetal en países desarrollaos son les enfermedaes hipertensives, sobre manera si s’acompañen d’un cuadru conocíu como preeclampsia, pudiendo llegar a ser les responsables d’hasta un terciu de tolos retrasos nel crecimientu fetal.

La preeclampsia ye un síndrome específicu del embaranzu qu’afecta tanto a la madre, al traviés d’un mecanismu d’alteración vascular, como al fetu, provocando una restricción del crecimientu intrauterín. La preeclampsia constitúi la primer causa de mortalidá materno en países desarrollaos y asóciase, amás, con un incrementu del riesgu de partos prematuros y mortalidá perinatal.

De momento nun hai nengún tratamientu que prevenga o retrase l’entamu d’esta enfermedá. Nos últimos años, por contra, produxéronse avances relevantes nel estudiu de les causes, qu’aporten esperances en posibles intervenciones preventives. Estudios nuevos suxeren que les alteraciones vasculares na preeclampsia tán mediaes por un escesu de producción de radicales llibres o procesos de estrés oxidativo. Los radicales llibres prodúcense continuamente nel organismu nel metabolismu normal de les célules, como reacción énte una infección, o tamién como respuesta a la esposición de radiaciones ionizantes, rayos ultravioletes, contaminación ambiental, fumu de los pitos, o escesu d’exerciciu. Los radicales llibres d’oxíxenu causen dañu oxidativo, y ésti vióse implicáu nel orixe de delles enfermedaes, ente elles, distintos tipos de cáncer, enfermedaes cardíaques y vasculares, diabetes, enfermedaes neurolóxiques, patoloxía oftálmica y aveyecimientu.

Les reacciones en cadena provocaes polos radicales llibres sólo s’eliminen polos llamaos sistemes antioxidantes defensivos, compuestos fundamentalmente por enzimes antioxidantes, qu’intenten prevenir la producción de radicales llibres mui reactivos, y un segundu grupu d’antioxidantes non enzimáticos o vitamines antioxidantes (vitamina C, vitamina E), que neutraliza l’acción de los radicales llibres yá formaos. Cuando hai un disbalance ente la producción de radicales llibres y la capacidá antioxidante del organismu pa neutralizalos, tamos énte procesos d’estrés oxidativo.

Les embaranzaes con una capacidá antioxidante disminuida (bien por inxesta deficiente de vitamines antioxidantes, o por actividá insuficiente de les sos enzimes antioxidantes), podríen tar más predispuestes a desarrollar preeclampsia, y tener un fiu con prematurez o pesu baxu al nacer.

Si esistiera evidencia suficiente d’un mayor riesgu de preeclampsia y/o retardu de crecimientu intrauterín nos embaranzos de les muyeres con una capacidá antioxidante deficiente nes fases primeres del embaranzu, una dieta rico nestes vitamines o bien l’alministración de suplementos antioxidantes podría prevenir o apaciguar los efectos d’estes condiciones adverses perinatales.

Pero nun hai qu’escaecer que munchos tóxicos ambientales producen dañu nel organismu per medio de procesos d’estrés oxidativo. Amás de los posibles efectos provechosos de les vitamines pa prevenir la preeclampsia y favorecer el crecimientu fetal, una dieta materno y infantil rico en fruta, verdura y hortaxela va facer menos vulnerables a la embarazanda y al neñu frente a les posibles agresiones ambientales.