Metales

La esposición a plomu o mercuriu produzse pente medies de la inhalación, de la inxesta d’agua o alimentos contaminaos o al traviés de la placenta o de la lactancia materno en neños.

Metales contaminantes:

El plomu ye un metal natural que se pue atopar n’estremaes zones del mediu ambiente, anque la mayor parte provién de les actividades del home, como la producción de bateríes y de municiones, ente otros. A cuenta de la preocupación de los efectos d’esti metal na salú redúxose la so presencia na gasolina, les pintures y les cerámiques.

Los neños pequeños espónense a esti metal per medio de la inxesta de pintures que lleven plomu, por exemplu chupando xuguetes recubiertos de pintura. Los rapacinos son más vulnerables al envenenamientu con plomu que los adultos por mor de qu’un neñu qu’inxera cantidaes grandes pue desarrollar anemia, dolor estomacal, debilidá muscular y alteraciones nel sistema nerviosu. Los fetos espónense al traviés de sos madres y los efectos potenciales sobre la salú infantil inclúin prematuridá, retrasu nel crecimientu, alteraciones nes habilidaes mentales, dificultaes nel aprendizaxe y alteraciones nel desarrollu motor.

El mercuriu ye un metal que, combináu con otros elementos como’l sulfuru o l’oxíxenu, forma’l mercuriu inorgánico o les sales de mercuriu, que s’usen como polvos o cristales en cremes cosmétiques o en cremes antiséptiques. La fonte principal de mercuriu ye l’usu de combustibles fósiles, fundamentalmente’l carbón que contién traces d’esti metal. Al quemalo, esti compuestu entra nel mediu ambiente. En medios anaerobios (cuando nun hai oxíxenu) les bacteries tresfórmenlu en metil-mercuriu. Esta forma ye la que se bioacumula más fácilmente n’organismos y en persones. Ye, amás, un metal que s’usa en termómetros (y en dellos instrumentos médicos), en tratamientos dentales y en focos fluorescentes, piles y bateríes.

Igual que col plomu, los rapacinos son más sensibles a los efectos del mercuriu que los adultos. Dientro d’estos efectos destaca’l dañu nel sistema nerviosu, retrasu mental, incoordinación, ceguera y dificultaes na fala.