Compuestos organocloraos

Los compuestos organocloraos (OCs) formen parte de los compuestos orgánicos persistentes (COPs) pola so presencia en tol planeta, la so bioestabilidá y la so lenta biodegradación, la so acumulación nos texíos grasos y la so vida media llarga. Como’l so propiu nome señala, los OCs son compuestos químicos orgánicos n’onde dellos o tolos átomos d’hidróxenu sustitúinse por cloru.

La producción y l’usu intensivu d’estos compuestos emprincipió nos años '30 en procesos industriales, como la producción d’aisllantes, y agrícoles, como la producción de pesticides. Munchos d’estos compuestos tán anguaño prohibíos, pero siguen tando presentes pola so lenta biodegradación y pol so usu nos países del tercer mundu. Los beneficios d’estos compuestos como pesticides sintéticos son innegables, pero la molición polos posibles efectos adversos na salú col tiempu fue n’aumentu nos caberos años. Estos compuestos tienen una vida media de 10 años o más, y a cuenta de les sos propiedades químiques tienen gran capacidá pa llegar a zones remotes; puen tresportase pela atmósfera y acumulase na materia orgánico del suelu y nos organismos vivos.

Los OCs espardiéronse per tol planeta. Nos seres humanos la vía d’esposición mayoritaria ye pente medies de la dieta rico en grasa, y diferentes estudios amuesen que n’España bien de los alimentos de consumu habitual (carne, pexe, güevos, lleche y derivaos lácticos) contienen p,p'DDE, PCBs, HCB y isómeros de HCH. L’aire y el consumu d’agua son tamién víes d’esposición ambiental. Almacénense n’órganos ricos en grasa, como’l fégadu o’l cerebru, y tamién s’atopen en sueru o en lleche materno. Estos compuestos pasen la barrera placentaria, y los lactantes incorpórenlos unes venti veces más que los adultos. Nos tres primeros meses de vida llega acumulase’l 6% de tolo que se va acumular na vida.

Estudios fechos en naciatos pa evaluar los posibles efectos d’estos compuestos en poblaciones espuestes a niveles habituales del mundu desarrolláu, demuestren una asociación pequeña ente la exposición prenatal a PCBs y el crecimientu y el desarrollu motor y cognitivu posterior. N’adultos, la esposición a OCs vese asociada con cáncer, enfermedá cardiovascular y alteraciones endocrines (sobre manera alteraciones nel sistema tiroidéu).