Notícies asturianu
Martes, 12 de xineru de 2010
EE UU amplía la llista de sustancies contaminantes
Con esta incorporación, yá son 300 los compuestos químicos sometíos a vixilancia por tar presentes nos cuerpos de los ciudadanos norteamericanos, y poles posibles consecuencies negatives que podríen xenerar. Compuestos químicos como'l bisfenol-A, que s'atopa en munchos plásticos, o los retardantes de la llama que s'utilicen en munchos texíos figuren na llista. Éstos son dos de los nuevos 75 elementos incorporaos al informe nacional sobre esposición humana a productos químicos, un estudiu que de magar 1999 ta realizando'l Centru pal Control d'Enfermedaes (CDC), col obxetivu de determinar qué productos químicos consiguen trescalar nel cuerpu de les persones y con qué fuerza. Esti ye'l cuartu estudiu realizáu dende aquella, y hai que destacar que de los 212 elementos contaminantes que figuraben nel primer llistáu fechu, agora la cifra disparóse hasta casi los 300.
Técniques de muestreo
Pa realizar l'estudiu pañáronse muestres d'orina y sangre a más de 2.500 estadounidenses de diferente edá y sexu, tando l'universo del estudiu espardíu por tolos Estados Xuníos. Según se conseña nel mesmu, l'elementu químicu que más fácilmente penetra en cuerpu de los ciudadanos norteamericanos ye'l bisfenol-A o BPA, yá que s'alcuentra na orina del 90% de los encuestaos.
Esti productu úsase como componente de plásticos d'usu común, tamién en llates, cartuchos de tinta, gafes, dellos xuguetes o biberones. Hai estudios canadienses que non sólo confirmen la so presencia nel organismu de les persones, sinón que tamién alerten sobre los sos efectos nocivos, d'ehí qu'en Canadá y incluso en California se tea discutiendo y muncho sobre la so posible prohibición. N'Europa, según comenta Miquel Porta (Barcelona, 1957) -investigador y catedráticu de salud pública del Institut Municipal d'Investigació Mèdica (IMIM) y de Medicina Preventiva y Salu Pública de la Autónoma de Barcelona (UAB)h- el pasáu martes 12 d'avientu nel periódicu 'El País', tovía nun se considera qu'haya conocimientos abondo como pa prohibir el so uso. Pel so llau, en Canadá y en California yá alertaron de que pue favorecer l'aparición de problemes de conducta, inducir alteraciones precanceroses nes células o perturbar les hormones del desarrollu.
Más sustancies contaminantes
Xunto al BPA, esti estudiu tamién revela otros datos interesantes, como la presencia nos organismos estudiaos de delles sustancies contaminantes más. La primera d'elles sedríen los retardantes de la llama. Utilizaos como antiinflamables n'ordenadores, cortines o tapiceríes, yá se demostraron los sos efectos nocivos n'animales, afectando a les tiroides, el fégadu y el cerebru. Tamién s'atopó cadmiu -usáu en bateríes, plásticu, tabacu...- o la presencia d'acrilamides, que se formen pola combustión del tabacu y na cocción de carbohidratos, siendo canceríxenes en dosis altes nos animales.
P'acabar, destacar qu'en mundu sólo Estados Xuníos y Alemania realicen estudios de biomonitorización tan exhaustivos, y ente nós la meyor referencia tenémosla nel estudiu fechu por Miquel Porta. L'informe basóse nes muestres de sangre y orina efectuaes a 919 persones, y, acordies con él, toles persones analizaes taben contaminaes por polo menos tres de los 19 compuestos analizaos.